Sa dami ng ating napapanaginipan, malamang wala na tayong panahon para iinterpret pa ito isa-isa. Yung tipong palilipasin na lang natin dahil sigurado namang iba na naman ang mapapanaginipan natin sa susunod na gabi. Pero kung bibigyan natin ng oras na alamin ang nais ipahiwatig ng bawat panaginip natin, maaaring magabayan tayo nito sa ating buhay.
Tulad ng panaginip na marami kang bagong gamit. Halimbawa ay mga appliances o kaya ay gadget, mga damit,alahas, paintings at kung anu-ano pa. Kapag nanaginip ka ng ganito, ibig sabihin ay marami kang mga plano na binubuo sa iyong isip. Meron kang mga bagay na inaasam na gustong gusto mo talagang makuha sa lalong madaling panahon. Kaya ikaw ay nagbubuo ng plano kung papano ito mapapasa’yo. Kung ang mga bagong gamit na ito sa panaginip ay nahahawakan mo at naeenjoy mo, ito ay nagpapahiwatig na makakamit mo ang inaasam mo sa nalalapit na panahon. Yung hindi na masyadong matagal ang ipaghihintay mo.
Kung sa panaginip mo naman ay nakikita mo lamang ang mga bagong gamit na ito subalit hindi mo naman nahahawakan, ito ay nangangahulugan na ang inaasam mo sa totoong buhay ay hindi mo pa makukuha. Maaaring wala ka pang ginagawang move para makamit ito o kaya naman ay marami pang nakakahadlang sa’yo para makuha ito.Pwedeng kulang ka pa sa budget o meron pang mas mahalagang bagay kang inuuna at pwede rin naman na may taong nakakapigil sa’yo. Kaya kung napanaginipan mo ang mga bagong gamit, analisahin mo sa iyong isip ang kaugnayan nito sa mga kaganapan sa buhay mo dahil tiyak na meron itong nais ipahiwatig sa’yo.
Kung may gusto ka at wala ka pang sapat na ipon para bilhin ito, dapat mo itong pag-ipunan. Kung meron ka namang budget pero may pumipigil sa’yo, ikaw lang ang makapagpapasya kung magpapapigil ka. Basta’t ipinakita na sa’yo ng iyong panaginip ang kaugnayan nito sa katotohanan ng iyong buhay at nasa sa’yo na kung anong pagdedesisyon ang gagawin mo para sa iyong ikabubuti.
